محشى السبيط ( الكالامارى )

الكمية تكفي: 4 أشخاص
وقت التحضير: 20 دقيقة
وقت الطهي: 30 دقيقة

المقادير: سبيط منضف ومنقوعفى مايه وليمون ولعمل الحشو رز مغسول بصله مفرومه شبت وبقدونس وكسبره مفرومين فلفل اخضر مفروم طماطم متقطعه حتت صغيره او متسبكه زى ماتحبى نص كوبايه زيت وطبعا ملحك وفلفلك وتوابلك المعروفه ولعمل خلطة الطماطم فصوص توم مفروم فلفل اخضر متقطع حتت صغيره طماطم متقطعه حتت صغيره كسبره خضرا مفرومه معلقتين صلصة طماطم صغيرين

التحضير: نحضر الخلطه الى هنحشيه بيها
بزبط زى خلطه الممبار وحتى نفس طريقته فى السلق

الطبخ: نبدأ بقى فى حشو السبيط
بس ناخد بالنا مانكدسهوش بالرز لانه لسه هيكش فى السليق
يعنى من الاخر كده نفس فكره الممبار
هنحط ميه على النار ونقطع فيها بصلايه ولو عندك توابل للسمك هتبقى حكايه
ولما تغلى الميه نحط السبيط فيها براحه ونسيبه بقى يستوى حوالى نص ساعه تقريبا
على بال مايتسلق بقى نحضر خلطه الطماطم الى هنحطوا عليها
وهى عباره عن ( 3 فصوص توم مفروم - فلفل اخضر متقطع حتت صغيره - طماطم متقطعه حتت صغيره - كسبره خضرا مفرومه - معلقتين صلصة طماطم صغيرين )
بعد كده هنحط شويه زيت فى الطاسه ونضيف التوم والفلفل ونقلب لحد ماالتوم يتحمس حلو
وبعدين نضيف الطماطم والكسبره ونشوحهم كويس
وبعد كده نحط معلقتين الصلصه ونضيف حوالى كوبايه مايه ونحط التوابل بتاعتنا ونسيبها بقى تتسبك براحتها
بعدما يستوى السبيط نبدأ بقى نرصه فى السرفيس بتاعنا الى هندخله الفرن او اى صنيه عندك نصب خلطة الطماطم بقى على السبيط بتاعنا وهوووب نحطها فى الفرن
يادوب ربع ساعه كده تمسك نفسها وتتحمر شويه ونطلعها
ممكن تتقدم مع سمك بانيه او سمك مقلى وطبعا الرز الاحمر بتاع السمك والسلطات بقى واللذى منه مش هوصيكم
وبالف هنا وشفا